（文/至尊寶）
尋日，我用住手機程式上Facebook，無啦啦見到學生會有個新搞作，話要整咩手機程式。我一開頭就得啖笑；睇完內容先嚇一跳。原來呢個程式係咁猛料，又只需要15萬，仲抵過起一條高鐵。問問身邊嘅朋友，竟然大家都唔知有呢回事，實在係太可惜啦！所以，我決定喺度同大家介紹呢個神奇、頂級、超卓嘅手機程式。
程式第一個功能就係俾唔同學會 post相同加hashtag，而用戶就可以follow、like、comment同share。有咗呢個程式之後，我地就可以睇到各屬會嘅最新動態，仲有得like啲得意相，真過癮！你可能會問，咁同Facebook或者Instagram有咩分別？我做咩唔用Facebook？你咁諗就錯啦，Facebook同Instagram係鬼佬研發嘅，但係學生會呢個程式係本土開發㗎嘛！依家咩都要講本土；鍾樹根要講本土，范國威要講本土，手機apps？緊係要本土啦！
另外一類功能就係關於福利嘅。個apps可以提供e-coupon俾會員使用，又有唔同優惠資訊嘅update， 環保、方便又快捷。大家仲可以喺登入後透過呢個程式攞Superpass，唔使學生證都得。你可能又會問，咁我唔可以show學生證攞優惠咩？唔可以show學生證攞Superpass咩？又錯喇！我地可能會唔記得帶學生證，搞到冇得享用優惠；但係就唔會唔記得帶電話。喺呢個年代，一個人冇智能電話點生活？正常學生會唔會唔帶電話吖？可以用一個成本只係15萬嘅apps代替學生證，抵到爛啦！
個apps仲有一類關於校園生活資訊嘅功能，提供飲食好去處、校園地圖、友好連結、同埋設施開放時間。你又會問喇，咁我唔可以上網check咩？錯曬啦！用手機瀏覽網頁check咁麻煩，緊係用apps啦！開個apps，搵到條link再㩒入去，等手機自動direct你去Safari，唔係方便好多咩？順便睇埋飲食好去處：咦，原來B出口有間野叫永利清湯腩，幾正咁喎！唔用呢個手機apps，邊有人留意到呢D食肆嘅存在？15萬間接拯救小店，值得做，應該做，馬上做！
最後一個功能就係投票：會員可以透過apps表達意見，方便學生會諮詢同學。你最後都要問喇，咁上網收集同學意見唔得咩？用Google form唔得咩？錯！喂，唔好下下話錯先得㗎；俾少少面嚟吖。面呢，固然就係人地俾嘅；但係假呢，就係自己攞嚟丢嘅！電子投票一向都係港大嘅優良傳統，網上填問卷點可以比擬？政改方案可以電子投票，廢除校監可以電子投票，點解學生會方案唔可以？舉個例，第日有人話要攞十幾萬嚟整啲無謂野，我地都可以用電子投票反對佢吖？
一句到尾，呢個app集多項功能於一身，簡直係冇得頂！我喺到懇請各位評議員，唔好再搞咩無謂嘅討論啦，盡快等各位基本會員都可以享用呢個正apps啦！