（/文：鄧欣）
事緣係咁，港大中文教育二年級學生下個星期會去北京師範大學讀兩個月書，因為學生宿舍裝修緊，所以學校安排第間住宿。但學生上個星期先知道，原來佢哋即將就要住一間「連鎖時鐘酒店」。有同學成立關注組，發表聲明，指酒店亳不安全、質素低劣，例如門外張貼性工作者的名單及卡片、沒有保安人員等等。
Department柒、對department不滿，好多學生都有同感。小至那些admean staff，declare個minor都要畀佢屌鑊金；大至有些老師終日拿着world no. 6來打飛機之餘又貶低隔離學校教育系的學生。港大教育學院點柒，不贅。（頭盔：當然有好多好老師）
但你發聲明屌柒department，好應該有碗話碗有碟話碟。佢衰倉卒通知你，你咪屌佢倉卒囉。佢無好好交代酒店資料令你地擔心，咁你咪屌佢不負責任冇好好講清楚。如果你唔滿意間酒店無wifi、廁所壞壞地，你就老老實實寫出嚟。
但通篇聲明，發放恐性言論，誇大對性工作者厭惡仇恨，污名性交易，蔑視時鐘酒店。大佬你係香港冇地方扑嘢都要去百佳、維記啦，土地供應不足嘛，仲好意思話「眾所周知『時鐘酒店』是怎樣的概念」。文中一句「學生完全暴露在『燈紅酒綠』的環境中，人生安全完全不受保障。」你去北京都係完全暴露於霧霾。我相信霧霾同埋北京嘅廢氣更加威脅你人「身」安全，實在係無需要太恐性。
好笑嘅係，你質疑department冇詳細了解酒店的情況，草草安排住宿。我尋晚發個訊息問個IEd朋友，咁好彩佢有好幾個樓友都住過嗰間酒店（北京太平莊店速八酒店），他們說服務唔錯，常常幫房客換床單，間房有野爛又會即刻上黎整。有人坐服務台前面望住門口入來的人，安全不成問題，很滿意整體表現。你都可以留意下，問下IEd同學。openrice有打手嘅同時，其實大眾點評網都未必可信。
有一件非常有趣嘅事，曾經入住過速八酒店的IEd學生提到，有次馬伕不小心將性工者的名片貼在某一間學生住的房門出面（一般而言，他們知道係學生住的都不會貼），被學生發現之後，馬伕和酒店的負責人向學生連番道歉。咁當然你想要性服務，佢地應該無任歡迎；但就唔好ff到以為馬伕係人都兇，性工作者係人都搞。
高興見到你哋寫自己係「一班熱愛教育，將其視之為使命的學生」，但若果教育界未來嘅基石係咁恐性、排斥小眾、將仇恨無限放大，咁我會覺得非常難過。
喺北京兩個月我過得好開心，希望你哋都可以過得開心。遊北京嘅攻略都可以同你哋分享，小至師大邊間茄蛋飯最好食，大至邊度有食到你肌肉溶解嘅小龍蝦（但好好食）、點樣走哂啲堂都考到二級乙等、去邊度可以睇到地道北京面貌等等，都可以和你們開心share。誠心祝願你們在北京玩得開心，考試勁過。
香港大學教育學院四年級生
鄧欣
傳送門：
學苑即時：【港大中教學生將到北京師範修讀課程 獲安排入住「時鐘酒店」】
http://bit.ly/1WwX1xL
港大中教關注組：【致所有關注教育的人】
http://bit.ly/227hl8R
轉載自作者Facebook