/圖、文：陳皮
德國嘅聖誕市集同香港嘅年宵花市都有少少類似，都係喺大時大節嗰時俾大家行下玩下，但相對德國呢面嘅開檔時期就長好多。通常嚟講城市嘅市集檔期就會由將臨期第一個主日（Erster Advent）前嘅星期五，又或者會係再早一個星期五開，到十二月廿二號或者廿三號先完；小鎮就短啲，大部分都只係開一到兩個禮拜嘅時間，但都係會長過香港嘅年宵嘅。
飲飲食食嘅攤檔就自然走唔甩啦。賣嘢飲嘅檔就大多數都賣暖嘅嘢飲：朱古力，果汁同Glühwein（紅酒做底，再加其他香料，例如橙皮，檸檬皮等等去煮）。Glühwein可以話係德國聖誕市集最有特色嘅一樣嘢，你唔會揾到有一個市集係無賣Glühwein。煮完嘅紅酒相對有啲酒精揮發咗，飲多幾杯都唔會醉。我個人非常鐘意飲，但對有啲人嚟講就唔係太好飲。
至於賣嘢食嘅就五花八門囉。咸嘅、甜嘅、煎嘅、炒嘅、蒸嘅，乜都有得你食。喺到揾食，相同價錢下飽過你去平時餐廳食嘢。
Reibekuchen（大約係薯仔加洋葱煎餅，通常會配蘋果醬）係我第一樣食到嘅嘢。四歐有三件。食完已經勁飽勁驚第二日會熱氣，嗰晚即刻同朋友去咗飲杯鬼佬涼茶下下火。
除咗嘢飲嘢食之外，重有好多嘅係賣手工產品嘅檔口。見到好多都真係好靚，而且手工有返咁上下，但真係好貴，最後都無點買到嘢。
嗰時波恩嗰市集第一日開啲德國朋友已經興奮到叫哂人一齊去。喺香港嗰時我真係未試過問朋友：「喂，你今晚一唔一齊去行花市？」嗰晚到到都好多人，重有戶外音樂表演，喺聖誕市集上果真充滿了快活的空氣。
之後重有去過附近一兩個城市嘅聖誕市集，不過佢地都同波恩嗰個差不遠。反而有次同朋友去波恩附近一個小市鎮，嗰度嘅市集反而比到驚喜我。
錫格堡（Siegburg）位於波恩西北面。人口只係得四萬多少少，大約等於港大科大全體師生加埋，基本上全港十八區每一區都多人過呢到兩三倍。點解呢嗰鎮仔嘅聖誕市集會俾到驚喜我？就係因為呢個市集重嘗試緊去保留中世紀時候嘅模樣－－完全唔用電，就連每一個檔口入面嘅照明都係油燈，同其他我去過嘅聖誕市集感覺完全唔同。
雖然呢到係鎮仔，但一樣人山人海。想去買嘢嗰時都一樣要排好耐隊。
去得聖誕市集，緊係要嚟返杯Glühwein先啦！嗰日咁啱有啲涼，而且錫格堡又係山上，飲完全身都好暖。難怪Glühwein會係唔同地方嘅聖誕市集都咁受歡迎。
－－（請按第二頁繼續）－－
呢到賣啲嘢食好多都係第一次見，所以最後就決定同朋友每人去排隊買一樣，咁大家就可以試哂全部。我就買咗呢一個蔬菜炒飯。雖然味道緊係同亞洲地方嘅炒飯差好遠，但佢香料同啲切粒瓜菜個配搭好新鮮，再加埋飯上面啲醃菜，食完喉嚨好舒服（認真）。
呢棵真係真嘅聖誕樹啦。咁大個仔都係第一次親眼咁大棵聖誕樹。
食完行咗一個圈，開始覺得涼，就緊係要圍爐取暖。
模仿返中世紀聖誕市集會做嘅雜技表演。睇住佢由三支火把玩到五六七支都咪話唔驚。
因為要還原中世紀嘅原故，連旋轉木馬都要打回原形，想玩木馬先要揾嗰人做咕呢。一眾德國瘋小孩嘅老豆就自然俾人放咗上枱⋯⋯睇見都覺得辛苦。
喺香港從來都無鐘意過年宵市集嘅我，喺去完咁多次聖誕市集之後，都有考慮過我係咪應該下年返到香港要去行下花市。
如果各位讀者有興趣想感受一下德國聖誕市集氣氛嘅話，其實德國駐港總領事館喺啱啱嗰兩個星期六日都有係赤柱搞到一個。據聞呢兩年反應都唔錯，相信佢地嚟緊嗰年都會繼續舉行。嗰到當然唔少得有Glühwein賣啦！