德國係一個vegetarian-friendly嘅國家。餐廳食肆大多數都有提供素食嘅餸菜俾客人，而且仿肉產品嘅水準非常之高。Schnitzel（炸豬扒）、Frikadelle（肉丸/肉扒）等嘅素食仿肉並唔難喺超市揾到，價錢亦都唔貴。我記得local buddy有次同我講過話，其實佢都有好多朋友想轉食素，但喺德國腸始終都係太大誘惑啦。德國腸無得頂呢樣嘢，我可以同讀者講喺真嘅，揾次再同大家論盡德國腸。不過，我覺得對我嚟講最大嘅阻力反而唔係腸，而係熊仔糖。
熊仔糖就大家都一定食過，而當中最出名嘅就一定係Haribo呢一隻牌子。香港最常見到嘅係金色嘅包裝，加上大大隻黃色熊喺面。超市大約做十蚊至廿蚊一包。雖然比起其他不知名牌子又或者係糖果鋪夾返嚟嗰啲貴，但我覺得貴得係有返應有嘅quality架喎。話哂gummi candy係Haribo發明，其他咩牌子都好，都做唔到Haribo嗰隻咁有咬口。而且Haribo喺果汁味上做得好好，唔會話太甜，亦唔會話藥水味。
食糖啫，又關食齋咩事呀？有啲讀者可能已經知道，其實gummi candy本身主要材料就係明膠，由牛或豬嘅皮、骨等地方提取再加工而得嚟，所以都算係一種動物製品。當五花八門嘅肉製品都有素食版本嘅時候，又點會無素食gummi candy呢？早幾年Haribo開始有賣無用明膠嘅gummi candy。但我就覺得雖然係咬口方面係有落過苦功，仍然都係比普通嘅產品差咁啲。
之前都有提及過，Haribo呢間公司其實係發源於波恩。Haribo就係正正創辦人Hans Riegel同Bonn每一個字嘅嘅頭兩個字母砌出嚟嘅簡寫。唔知係咪本土產品呢個原因，係到食Haribo真係好平（專門店賣€0,8到€0,9上下一包，圍起港紙7到8蚊）。咁好食又平過喺香港咁多，我都係注定食唔到齋㗎啦⋯⋯