文／好掛住部PS4
話說小弟呢個sem──66咁，入到名大exchange一個學期，脫離Kong U嘅垃圾行政（雖然其實無完全脫離到，不過呢D係後話）同SU can嘅折磨。難得去到香港人嘅第二故鄉日本留半年，可能好多人會表示葡萄，但其實呢D人絕大多數都唔了解日本嘅大學生活係點。反正呢排小弟無咩功課做，就無聊講少少。
一：名大對課堂時間有好嚴格嘅規定，所有嘅lecture都只會係每日規定嘅時間進行，每堂個半鐘並相隔15分鐘，8：45開始， 19:45完唒。12點到1點係所謂嘅lunch hour，唔會有堂上，但相對地canteen就差唔多一定要排隊。所以如果你有辦法錯開時間，想坐定定慢慢食絕對唔成問題。不過，呢D井然有序嘅時間安排，做lab嘅人係絕對唔會享受到der。#食屎啦文科仔
二：名大作為日本國立大學之一，享有嘅資源遠勝於附近幾座私立。（呢一區被劃分為學區，附近有3間大學同無數到有幾多嘅小中學校）除左有地鐵站喺地底之外，佔地、設施、名氣（from當地人）都係top class嘅。老老豆豆，除左呢區好寧靜同平地比較多之外，都有幾分似HKU。不過，因為名大以理系為主（前身為醫院），所以文科基本上只佔全校六分之一位置，仲要係堆埋係角落。雖然就幾方便上堂，不過都係幾sad。#憐可
三：名大對於教學上嘅取態相當自由，上教授堂學嘅基本上就係學佢嘅研究領域，例如小弟上嘅日本近代史料學，學嘅就係教授嘅專精近代石碑。當然，呢度嘅學生都有必修課要上，就小弟所知，英文同體育係一定要讀嘅科，sosad。另外，呢度嘅教授通常甚少會提assessment method，多數都會係deadline前一個月先會開始提，俾著係Kong U學生可能上完第一堂就已經drop Q左佢，不過呢度D學生似乎都已經習以為常。另外，大部分lecture都無required reading，想研究嘅就要自己摺lib。但係名大規定你每學期至少要讀15credit，而大部分course都只有2credit，要科科自chur其實好辛苦。
四：名大嘅canteen由名古屋大學生活協同組合（生協）營運，聽個名就知係圍繞大學嘅機構而唔係出面公司，亦都因為咁，佢地提供嘅野食係好──好──食。除左一般嘅飯同麵之外，佢地亦有一個好似一念咁跟重量計錢嘅自助corner，而佢嘅計法係1.4g 1円。佢地仲會每個月轉menu，有時仲有一星期嘅限定menu。對於食慣頹飯嘅小弟嚟講，成件事真係好唔真實。如果仲係嫌貴，生協仲會喺隔離便利店賣同樣料嘅飯盒，再平多一兩百円。佢地嘅便利店除左賣嘅野平過出面Lawson之外，有時仲會促銷其他公司嘅產品，而且都係大品牌。（例如早兩個星期，佢地就促銷過以賣忌廉包 #極邪惡 聞名嘅八天堂產品）嚟過呢度之後，我先開始知道，咩野叫做對學生好同提供福利，而唔係香港嘅一分錢一分貨。（另外，生協仲會提供平價旅行情報同幫你考車牌，WTF？）
今次寫住咁多先，下次同大家講吓名大嘅「部活」。（屬會活動）