／文：Rotten Tomato
時值清明，所謂清明時節雨紛紛，雨季將至，一眾同學又要番黎一個濕立立既Campus。雖然大家大可以帶遮，但係左手攬住laptop、右手覆緊Whatsapp係Campus遊走既我地，咁短路都開遮有時都真係幾煩，又有少少乸手唔成勢。我地特別追蹤Campus內大部分同學會行過既地方，我地發現有唔少地方，迎接雨季，水利工程同埋避雨措施都有亟需改善之處。
水利工程黑點一 – Main Library Starbucks外
Main Lib側面既電梯一向係同學來往地鐵站、校園西面同校園東面既主要樞紐。過去一年，每逢大雨，電梯通程Starbucks既一後路都會形成大型水氹，同學要涉水或者繞路而行，非常不便。
水利工程黑點二 – 黃克競平台電梯
黃克競平台電梯開放後，車水馬龍，係同學來往大學上下層既熱門路線，然而每次落雨，電梯雖有天幕保護，但都會非常撇雨，對同學構成不便，電梯經常收工唔撈，會唔會係因為撇雨所致，就要問番Engine人啦，不過講到壞電梯，同學好多時會行番對面既樓梯，而樓梯又冇瓦遮頭，都係玩同學。
水利工程黑點三 – LE橋
LE橋係同學去Main Building上堂，特別係CC Tuto既最佳路線，本身LE橋上有避雨設施，但我地發現，即時依家只係潮濕有霧，LE橋亦顯得非常濕滑。一旦落雨，LE橋既建築結構亦容易令流係天幕以及花槽既雨水流番落橋面，令LE橋濕上加濕，滑上加滑。LE橋有明顯斜度，若然濕滑，好容易會令去上堂既同學跣親，險象環生。
避雨設施漏洞一 – 民主牆外
講到避雨設施，相信唔少同學最大感受係每次落雨，民主牆外經常堆成人龍，為既係係Main Lib既騎樓下行過避雨。學校一直都有係唔少同學行既地方興建避雨設施，以方便同學。由地鐵站一直去KK Leung沿途都有避雨設施，唯獨民主牆外及民主牆到Starbucks之間既位置冇避雨設施。其實係依度興建避雨設施，工程本身唔會對同學構成大影響，建成後對Happy Park景觀亦唔會有大影響。
避雨設施漏洞二 – CYM Amenity Centre去CYM Canteen通道
CYM Amenity Centre重建後，去CYM Canteen同CYPP等地方比以前方便得多，但係吊鬼既係Amenity Centre外有鋼架結構，但並無安裝玻璃，而且由Amenity轉入去Canteen時，會離奇地冇瓦遮頭，明顯有Bug。
一眾水利工程黑點以及避雨設施漏洞已存在多時，校方亦未見有請承建商進行排水工程，我地認為雨季來臨，學生代表有需要向校方反映，校方亦宜多加留意依方面既問題，作出改善。
