/圖、文：Liona
Exchange生活好快差唔多過咗五分一，早幾日同個朋友傾偈，問起我喺荷蘭忙唔忙。作為一隻每個星期淨係上12個鐘堂而又無需要跑新聞嘅物體，學業事業上當然唔忙啦，不過plan去邊度玩都夠我忙啦XD。
繼上星期六日去阿姆斯特丹露營之後，今個星期就撇甩roommate自己去海牙玩兩日。無roommate我就當然唔會露營啦，於是就book咗Stayokay Hostel住，幾好，平，包早餐，同埋就腳，Central Station行10分鐘左右就到，然後再順便喺hostel個陣 book埋boat trip同Madurodam入場卷作為我第一日嘅行程。
唔記得交代，今次我主要係為咗海牙個Just Peace Festival而嚟。海牙係一個國際組織總部滙聚嘅地方，為慶祝9月21日國際和平日，海牙成個禮拜都有一連串大型活動舉行，包括慈善跑、相展、國際組織開放日等等。
星期六朝早九點幾到海牙放低埋行李之後，見距離船河上船時間仲有個幾鐘，於是就先到City Hall睇世界新聞攝影展（Just Peace Festival Highlights之一），好多攝自中國、美國、敍利亞等地嘅新聞圖片，女童被性侵、空襲後滿目瘡夷嘅照片輔以文字描述當時情況令人難受。
沉重過後就遊下船河散心喇。可能因為比較早啦（11am我唔知算唔算早），我坐班船得我、船夫同另外兩個荷蘭人，然後傾傾下偈發覺嗰兩個荷蘭人原來上星期去完香港，好有趣。講返個船河，程船由City Centre 去Scheveningen Beach，我地三個都係揀咗坐單程，喺Scheveningen Beach落，之後喺嗰邊行下。船夫喺City Centre 就好專業地講解唔同政府大樓嘅落成時間、呢個地方面貌嘅演變，去到近郊少少就開始講沿途見到嘅雀鳥品種，講解得好詳細。好鐘意個船夫嗰種寄工作於娱樂嘅精神，佢話佢每次都會帶埋相機同佢同行，因為個環境每日都喺度轉變，每日都可能會有新奇嘅嘢等緊佢。
Scheveningen Beach於我而言無乜特別，因為佢真係一個沙灘，只不過係個有個大碼頭同摩天輪嘅沙灘，只不過咁啱有風箏節，好多人放風箏，仲要係啲超巨型嘅風箏，於是我留咗陣影咗陣相食咗個希靈魚包之後就去Madurodam喇。
好，Madurodam其實就係類似小人國嘅地方啦，你會見到好多荷蘭嘅建築物，不過我麻麻哋鐘意呢個景點，好多人、好多細路，同埋好．多．魚，真係好．多．魚（熟我嘅都知雖然我食魚但係我好驚見到游緊然後向你擘大口嘅魚），影完啲建築物模型一唔小心望咗落個水池嘅話，總有一兩條向你擘大個口，真心嚇Q死朕。
行完Madurodam大概三點左右，有啲攰，於是決定返去我hostel附近嘅景點行，去咗Just Peace Festival有推介嘅Humanity House。Humanity House係一個以難民為主題嘅博物館，有展覽同體驗部分，展覽部分有一半淨係得荷蘭文，睇唔明，so sad；體驗部分幾難忘，博物館會將參觀者分隔，一個或幾個進入房間，沿住地下嘅指示一路行一路體驗由走難到獲得身份嘅過程。雖然過程係簡化版，好多沿途嘅景物都簡化咗，淨係望入牆上啲窿而唔係成個佈景整出嚟，不過一個人行都有少少不安感出現，最不安係入到一間有「鏡」嘅房，不過塊「鏡」係照唔到你自己，隔離有塊牌寫住「you don’t exist.」。當一個人逃難到一個地方，要證明得返自己身份，應該係件好難嘅事。
參觀完Humanity House之後就返咗hostel攞鎖匙食嘢飲酒瞓教。
第二日就係The Hague International Open Day。每個人可以預先登記參觀兩個國際機構，我揀咗The Organization for the Prohibition of Chemical Weapons (OPCW) 同埋International Criminal Court (ICC)。OPCW於1997年為執行《禁止化學武器公約》而創立，係繼聯合國之後第二大嘅國際組織，成個參觀好好玩，有得試佢啲防具同探測儀器，又有presentation講解目前化學武器嘅威脅，不過無論啲防具呀、探測儀器呀、定係解毒劑呀，我估都應該係無乜人希望自己用到嘅嘢。
International Criminal Court，國際刑事法院係就着《羅馬規約》而成立嘅一個國際組織，主要起訴及審判犯咗滅絕種族罪、危害人類罪、戰爭罪、侵略罪嘅人。參觀court點都無之前嗰個咁好玩，不過個人幾欣賞佢court room嘅設計，公罘席喺樓上，而樓下位置正正係證人作證嘅地方，可以好好保護有需要保護嘅證人。
兩日嘅旅程到此差唔多結束，當然仲有啲花生例如同兩個香港朋友夜晚去唐人街嘅所謂香港餐廳挑機，然後居然真係可以用廣東話落單同啲嘢食其實幾好食咁啦。參觀完啲國際機構，接收咗啲新知識之後最大嘅感覺都係要避免紛爭，其實都係靠自律，否則幾多所謂嘅國際公約都只會係一紙空文。
