話說早前有人喺討論區出咗個post，問有無人成日扮賓客去人宴會，結果有唔少高手喺入面切磋扮嘢技倆。而如果大家有留意開mass email嘅話，都應該知道有啲soc已經轉咗莊，就快搞inaug。如果大家有興趣透過inaug去了解唔同屬會、佢地嘅exco，又或者係覬覦inaug前後有得食嘅refreshments，不妨參考下呢個扮賓客攻略－－雖然多數soc都來者不拒（因為啲凳坐唔滿），無咩特登扮guest嘅必要。
衣著打扮篇：
要扮得似，首先要由衣著入手。除非特別講明，否則多數inaug嘅dress code都係formal。喺一個普通inaug入面唔係著老西而係smart casual（或者更頹）嘅服飾嘅學生，只有兩種，一種係上莊，一種係IT狗helper。
如果你好想了解唔同soc有咩refreshments（同freshmen），可以帶定套suit嘅衫褲，去嘅時候先換。當然係咪要日日帶住套西裝往返校園，同埋campus有咩地方可以俾你擺低件衫，就係另一件事啦。
注意事項篇：
有兩樣要避免嘅嘢就係太早到同同人吹水。畢竟話就話來者不拒，但其實多數參加者咪又係其他soc啲人。既然大家本身都識，就好自然會圍爐。EV之間一個爐、chair之間一個爐，甚至helper之間都一個爐。你唔喺任何一個爐入面嘅話，唔通真係喺度行嚟行去揈酒杯揈到開波咩？再者就算你想硬爆入一個爐，你都會因為唔知其他人傾緊乜而要自動彈開，遲少少臨開場先到好過。同去飲唔同，你早到都無得入場坐住先，而且多數soc喺inaug開始前嘅小食都比較少，咁倒不如疊埋心水等完場慢慢癡餐啦。
場內禮儀篇：
- 電話記得較震機，免得電話響阻住典禮進行。
- 人地拍手時跟住一齊拍，俾面主人家。
- 唔好訓著。
- 遵從MC指示，例如唱完soc歌應否拍手、離場順序等等。
Refreshments篇：
排隊攞嘢食時要有禮貌，切忌要求helper夾大量食物。由於多數soc都會用即棄餐具，建議全程用同一set，唔好係咁換碟換杯，愛護地球。最後嗰句，唔好飲醉。飲醉酒一嚟自己樣衰，二嚟仲會阻住人執嘢。唔好留戀太耐，走剩大約三分一四分一人嗰陣就好走，除非你發現原來個soc請咗你識嘅人做guest或者helper，咁你就大條道理留低吹多兩嘴。
如果有其他soc嘅同學認錯你做對莊，想交換卡片嘅話，建議話自己係其他U嘅對莊，至少佢無咁易發現你吹水嘛。但如果你想抄牌嘅話，建議扮無帶卡片，自稱來自某支遙遠嘅club咁樣。一晚交換十幾張卡片，鬼有咁易認得咩。之後嘅事，自己執生啦。
十一月 Inaug 一覽（最後更新：18/11/2016）：
屬會：德文協會
日期：十一月廿二日（二）
恭候時間：下午六點半
典禮時間：下午七點至八點
地點：明華綜合大樓MWT4講堂
屬會：英文學會
日期：十一月廿三日（三）
恭候時間：下午七點
典禮時間：下午七點半至九點
地點：黃麗松講堂
屬會：法文學會
日期：十一月廿四日（四）
恭候時間：下午六點半
典禮時間：下午七點至九點
地點：本部大樓MBG07室
屬會：歷史系系會
日期：十一月廿四日（四）
恭候時間：下午七點十五分
典禮時間：下午七點四十五分至八點半
地點：明華綜合大樓MWT5講堂
資料來源：Mass emails