喺港大校園，要喺一念以外的地方搵到素食並唔容易。每間餐廳都只有一兩道素食，一念唔開嗰陣實在難搞。還好地鐵通車之後，落山方便咗。早幾日，觀察家就喺朋友介紹下，去咗呢間喺卑路乍街嘅素食餐廳。
先show一下張單。呢餐有三個人食，但叫個二人套餐都算ok飽－－雖然叫二人套餐係因為啲嘢食都幾貴下。
由於個套餐有湯飲，而且可以自己斟茶，我哋無另外叫到嘢飲。
首先嚟嘅係頭盤涼拌茄子。矮瓜本身好難整得唔好味，麻醬都中規中矩，作為開胃菜係幾好。隻碟嘅設計幾有趣，就好似個切開一半嘅花瓶咁。燉湯嘅味道就唔識評價－－唔係差，只係啱啱踏入會不停飲屋企啲湯嘅年紀嘅觀察家仲未識點形容啫。睇圖都見到碗湯幾足料，所以建議大家唔好晒料，食埋啲湯渣。
乾煸羊肚耳珊瑚菌炒四季豆（左）、椰皇漿猴頭菇焗溫室南瓜（右）
飲咗幾啖湯，第一道主菜都嚟到嘞。四季豆嘅配菜幾新穎，特別係個菌真係好好食。啲椒都正，平時唔食椒嘅觀察家都食咗幾啖⋯⋯至於右邊個南瓜就無得彈，個味同椰漿個味又match。最特別係佢本身係好似一個南瓜盅咁，侍應喺上碟嗰陣喺大家面前切開個南瓜，實在令人想入非非。講返嘢食本身，猴頭菇本身入味，南瓜軟熟，美中不足係真係好快食完。其實觀察家本身都唔太鍾意食南瓜，但打多咗吉野家啲邊爐同食慣咗一念啲炆南瓜之後，就無咗種反感了。
侍應姐姐切南瓜嘅動作，可惜無影到仲係成個盅嗰陣嘅樣
若蘭上善炒飯（左）、唔記得咗叫咩名嘅甜品（右）
南瓜食到一半，個炒飯都嚟埋。份量唔多，味道亦不過不失。最後就係個甜品，餐廳好好人咁跟人頭送咁多個甜品，碗嘢甜而不月膩（雖然本身都唔會飽到滯），算係呢餐素食餐嘅優雅結尾。
後記：嘢食唔錯，惟價錢偏貴，除非提款卡準備好隨時受創，否則不建議隨便行入去食。但一班人去叫餸應該是不錯的，大家一齊積福，唔食小動物，何樂而不為？至於呢個素食巡禮出唔出到（二），就要睇下觀察家提款卡仲有無錢⋯⋯
餐廳名稱：若蘭慈素食
地址：卑路乍街李寶龍路路口前面
