【飲食台】西環素食餐廳巡禮(一)

0
159

喺港大校園,要喺一念以外的地方搵到素食並唔容易。每間餐廳都只有一兩道素食,一念唔開嗰陣實在難搞。還好地鐵通車之後,落山方便咗。早幾日,觀察家就喺朋友介紹下,去咗呢間喺卑路乍街嘅素食餐廳。

img_2016-12-06-134252

先show一下張單。呢餐有三個人食,但叫個二人套餐都算ok飽--雖然叫二人套餐係因為啲嘢食都幾貴下。

img_2016-12-06-134350

由於個套餐有湯飲,而且可以自己斟茶,我哋無另外叫到嘢飲。

img_2016-12-06-134338 img_2016-12-06-134347

首先嚟嘅係頭盤涼拌茄子。矮瓜本身好難整得唔好味,麻醬都中規中矩,作為開胃菜係幾好。隻碟嘅設計幾有趣,就好似個切開一半嘅花瓶咁。燉湯嘅味道就唔識評價--唔係差,只係啱啱踏入會不停飲屋企啲湯嘅年紀嘅觀察家仲未識點形容啫。睇圖都見到碗湯幾足料,所以建議大家唔好晒料,食埋啲湯渣。

img_2016-12-06-134342 img_2016-12-06-134307

乾煸羊肚耳珊瑚菌炒四季豆(左)、椰皇漿猴頭菇焗溫室南瓜(右)

飲咗幾啖湯,第一道主菜都嚟到嘞。四季豆嘅配菜幾新穎,特別係個菌真係好好食。啲椒都正,平時唔食椒嘅觀察家都食咗幾啖⋯⋯至於右邊個南瓜就無得彈,個味同椰漿個味又match。最特別係佢本身係好似一個南瓜盅咁,侍應喺上碟嗰陣喺大家面前切開個南瓜,實在令人想入非非。講返嘢食本身,猴頭菇本身入味,南瓜軟熟,美中不足係真係好快食完。其實觀察家本身都唔太鍾意食南瓜,但打多咗吉野家啲邊爐同食慣咗一念啲炆南瓜之後,就無咗種反感了。

img_2016-12-06-134301

侍應姐姐切南瓜嘅動作,可惜無影到仲係成個盅嗰陣嘅樣

img_2016-12-06-134311 img_2016-12-06-134320

若蘭上善炒飯(左)、唔記得咗叫咩名嘅甜品(右)

南瓜食到一半,個炒飯都嚟埋。份量唔多,味道亦不過不失。最後就係個甜品,餐廳好好人咁跟人頭送咁多個甜品,碗嘢甜而不月膩(雖然本身都唔會飽到滯),算係呢餐素食餐嘅優雅結尾。

 

後記:嘢食唔錯,惟價錢偏貴,除非提款卡準備好隨時受創,否則不建議隨便行入去食。但一班人去叫餸應該是不錯的,大家一齊積福,唔食小動物,何樂而不為?至於呢個素食巡禮出唔出到(二),就要睇下觀察家提款卡仲有無錢⋯⋯

餐廳名稱:若蘭慈素食

地址:卑路乍街李寶龍路路口前面