/圖、文：陳皮

面試嗰時，我俾人咁問：「Why would you like to study aboard for one year?」

諗返起報嗰時，諗都冇諗過就頭四個選擇都係放一年。

同其他地方唔同，德國嘅大學除商科外，基本上大部分嘅科都係用德文為主要授課語言。用英文教嘅科少之又少。半年，俾到盡真係六個月，更多情況其實係五個月或者更少，頭兩三個月捱下用德文上堂。到中間德文開始上手啦，上堂聽得掂啦，一大堆未寫嘅文等緊你，用德文寫紙又係另一個難關。搞掂埋寫嘅時候，你已經差唔多要返香港。去德國交流，半年真係唔夠。

最後OISE好好人咁派左一年俾我。就係咁，我嚟到左波恩，前西德嘅首都同「樂聖」貝多芬嘅故鄉。

雖然已經有學姊同我講過波恩嗰中央火車站係毫無霸氣，但作為前西德首都，我諗都唔會太弱雞掛。但係我錯啦，一落車第一個感覺就係：我係咪未到市中心？將波恩火車站同其他德國主要城市，例如法蘭克福、柏林又或者慕尼黑嘅火車站相比，好難想像波恩曾經係德國嘅政治中心。

第一日到咗埗之後首先要做嘅就係去大學報到同搞少少手續嘢，於是就要的住哂啲行李由火車站一路行（後尾問返其他人先知其他個個都搭的士算數）。去嘅路上我就已經俾呢個城市嘅街景吸引咗。

波恩既然係貝多芬嘅故鄉，城入面又點少得佢嘅雕像呢？大大個棟左喺波恩大教堂廣場中間。

講起波恩另一樣一定要提嘅就係熊仔糖（Haribo Goldbären）。熊仔糖大家都一定食過，而熊仔糖就正正喺嚟自波恩，所以喺波恩都有好大間嘅工廠直銷。入面可以揾到好多香港冇得賣嘅糖，同埋重可以自己夾想要嘅糖。