/圖、文：陳皮
早排學期頭嗰時就話SU Can啲鹹蛋有蟲，前一兩星期又有Grove開茶會。天下大學飯堂一樣頹，去得飯堂就要好多時預咗食頹嘢（山城友校某啲例外）。啲嘢食賣得咁平唔通重要預佢有街外餐廳級數咩。
港大就有間SU Can，波恩一樣有間SU Can！德國有大學嘅城市大多都會有一個叫Studentenwerk嘅非牟利組織為當地大學生提供各式各樣嘅支援，當然唔少對學生最貼身嘅當然係食（飯堂）同住（宿舍）啦。大家都知喺歐洲出街食嘢係貴過香港好多，所以有時無錢又唔想煮就會去咗呢啲飯堂食。基本嘅頹嘢大約兩至三歐羅就可以食到一餐，有時有啲無咁頹嘅，例如漢堡包，扒，又或者亞洲嘢就貴啲，最貴五歐左右。相比起出去食，其實五歐已經算好平（想食個麥當勞超值套餐都要七歐上下！）。
頹食指數：★★★★
難食指數：★★
第一次去食，就係食咗呢碟飯加個沙律。食完呢碟飯之後我再無試過喺飯堂又或者喺波恩任何一到食過第二次飯。個汁連同塊扒再搭個飯我敢講喺同SU Can廿蚊嘅洋葱豬扒腸仔飯，黑椒汁雞扒煎蛋飯，又或者係CYM三星飯有得揮。再搭埋沙律菜簡直係天衣無縫。如果頹飯係一個course我諗呢個組合會係有A range。
頹食指數：★★★★
難食指數：★★
見到嗰汁係咪好熟口面呢？大家可以睇返上一張圖，個汁係完全一樣嘅，塊排都係完全一樣嘅，唔同地方係無咗個飯。隱約記得每星期總有一兩日見到呢個汁（按：我一星期只去食一兩次）。雖然個汁係頹，但同洋葱汁，黑椒汁之類一樣，差極都總有個譜。味道正常。
頹食指數：★★
難食指數：★★★★★
整體嚟講，個汁，啲雞同薯條嘅味道都係唔錯嘅。而且講頹，又唔算特別頹。但係，左下角嗰碗嘢真係好－難－食。望落正正常常，以為係烚下紅蘿蔔嗰類啦。食落去第一啖，就知道SU Can都係有靈性，各位港大同學要好好珍惜SU Can。
自問都係SU Can兩餸飯常客，啲餸入面總有一味係時蔬瓜果，每次見到有新嘢喺嗰一欄嗰時都係對自己嘅一個挑戰，挑戰自己走出Comfort Zone，擁抱新嘗試，突破自我，當中需要嘅勇氣唔係只識食燒味飯同焗豬嘅懦夫可比。食落口有種唔知咩樣嘅甜味，個底有啲唔知係炆完嘅水定係汁。嗰日一齊去食嘅友人都話呢碗野簡直係世界級。個人覺得單評呢碗嘢嘅話，港大無一間可以比得上，離SU Can一百米以內嘅嗰一間都比唔上。食嗰間，我起碼知道自己食緊啲咩，但我由頭都尾都唔知食緊呢碗嘢係啲咩。
好彩嘅係，自此之後我再無見過呢碗嘢出現過。
頹食指數：★★★
難食指數：★★
腸加炒薯仔搭酸菜呢個組合幾正路，味道可接受。唔知係咪德國人啲汁普遍都幾重味，食開淡味嘅人可能會唔太鐘意個汁同啲酸菜。至於炒薯仔嘅，呢樣嘢都幾難整得差。綜觀嚟講算係咁多樣之中最有飯堂特色嗰樣。
頹食指數：★
難食指數：★
德國算喺其中一個係環境政策上取態比較進步嘅國家，當然本身國民都比較關注環境議題啦。食素喺呢到都幾普遍，身邊都有唔少本地朋友都係素食主義者。餐廳都好友善會有好多素食嘅選擇啦，沙律吧就係其中一個。價錢廉宜（每一百克六毫）再加上沙律吧點睇都好過上面啲餸，所以我都會間唔時唔食熱食去食沙律吧。
沙律吧當然有大路嘅選擇例如沙律菜、燈籠椒，亦有啲飽肚嘅伴碟好似縲絲粉、Couscous（圖中白色同橙啡色，少少似飯嗰啲）等等。間唔中都會有一啲肉類揀，唔洗話逼全世界食沙律吧都一定要食全素，而且啲肉即使係凍都幾好食！
兩間SU Can相比各有千秋。個人偏愛香港嘅早餐牛尾湯，午市兩餸飯同晚市黑椒汁咋咋聲；而波恩嘅沙律吧的確係一個幾好嘅另類選擇。誰勝誰負？我會學獎門人話齋：「唉！打和啦！」
題外話：
同港大一樣，波恩大學都有好多間唔同嘅飯堂啦。作為交流生就有幸喺開學前可以參加到其中一間重新開張飯堂嘅試食。比起波恩上面嗰一間，食物質素真係高好多。無論都係沙律，意粉，扒類，定其他都完勝港大咁多間飯堂。
雖然呢間飯堂好近我其中一個上堂嘅地方，但係次次上完堂都要撲巴士轉去另一到上堂，所以自嗰次之後都再未可以去試一次。可惜可惜。
