速報短評：學生會羞恥的一週

過去一週係學生會羞恥的一週。呢個就係港大學生嘅水平，學生自治嘅成果？

幹事會：「派對」後一片狼藉無人清理 幹事會管理疏忽遭遺憾

1. 老實講，係食野定係飲酒定係開Party真係無咩所謂，大家開心就好了。但係，用完間房清返呢樣好基本掛，聽日有會開有野做，咪安排好人手清囉；就算無人清，有無得同人傾傾，俾另一間房人用啊。俾人擺上黎質詢已經尷尬了，份書面回應仲要唔馬上道歉，問到邊個要負責就走去講啲咩清潔工友working hour，連評議員都覺得係唔真誠。醜。

2. 如果係屬會出事，馬上就興師問罪啦。係評議會到竟然就係咪regret，幹事會無主動提案，其他評議員又拖拉到AOB，幹事會最後除左UAS1 同CAP之外竟然全投棄權。幹事會既然都承認自己疏忽，竟然不但無提出有咩懲處自己嘅方案，仲對regret motion 投棄權，絕對係坐實咗係同學同屬會幹事心目中卸膊、嚴人寬己嘅形象。

評議會：擾攘三小時方選出署理主席 評議會議事混亂連番違法遭前幹事炮轟

評議會就違憲自我遺憾   追認本屆一切決議以釋疑慮

3. 好耐都冇見過啲人咁老實，第一句就話「因為唔合資格選評議會主席（CC），所以希望選個榮譽秘書（HS），好等我可以合返資格選CC喇！」然後仲不斷話我好有心做架、已經flow咗CC莊啦、想做21年度CC。但係問佢HS啲野，佢就話未flow莊呀，打算做Minimum（後來先改口）。評議會仲要為呢位人兄調議程俾佢先選HS。無言！

4. 犯錯多多少少都難以避免，畢竟大家都係業餘，好多坐咗係到都唔算耐，亦都唔寄望會有人將cons、bylaws、standing order倒背如流。但係原來CM01開始就已經錯，就真係難以置信——竟然咁耐以嚟無人發現？正如外務副會長提及，「追認」究竟可以點執行？以後屬會犯錯點好意思罰人呀？

5. 有前評議員表示今次係一場鬧劇，今日嘅討論除咗揭露評議員（當中不乏年資較長嘅評議員）嘅無知同低議事能力外一啲用都冇。好可惜，呢個其實係評議會嘅常態。好多時候大部分評議員又唔發言，發言前又冇準備，發言嘅內容又冇乜point，好多只係為咗盡責而出席（個「責」就係physically 出現係嗰會到）。都冇所謂了，開十個八個鐘冇乜人講野嘅會係你哋開、聽啲冇乜內容嘅說話係你哋聽、做啲戇居決定（大部分）都係你哋承受返。但係，有好多其他同學好努力做好自己嘅工作架，唔好搞到亡會，OK？